LA KOMUNIDAD DJUDIA DE IZMIR (SMYRNA)
Selim Amado
Izmir es una sivdad
mediterranea ermoza, topografikamente parese a Haifa.
Izmir fue un sentro
Sefaradi importante ke empeso a formarse mas de 100 anios despues de
la ekspulsion de Espania.
Kere dizir ke no uvo naves
ke trusheron Djudios de Espania al porto
de Izmir. Porke en el anio
1492 Izmir no era una sivdad bastante importante.
Oy kero avlar de esta
komunidad, de su historia, de sus partikularidades, de los
evenimientos
ke influensaron su vida
sosio ekonomika, de su folklor i vida sosyala, ansi ke de su estado
aktual kon mıs previsiones
para su futuro.
Kavamente la Sra. Sara
Pardo, guida de Turismo de munchos anios publiko un livro remarkable
en Turko sovre la
Komunidad Djudia de Izmir, profiti muncho de esta dokumentasion .
Kero mensionar kon grande
apresiasion a la Sra. Rachel Saba-Wolfe de la kuala me embezi muncho
sovre las luchas sosialas
en el seno de la komunidad. I otros manaderos. Ma yo no tengo
pretensiones akademikas,
mi buto es de dar a konoser esta komunidad Djudia Sefaradita ke
fue una de las mas
importantes para el Djudaismo. , i uno de los tres sentros grandes
sefaradis
en el Imperio Ottomano ke
fueron Istanbul, Salonika i Izmir.
Esta ermoza sivdad
mediterranea i puerto maritimo ke del punto de vista topografiko
parese
a Haifa, fue al sentro
de munchos evenimientos ke markaron la historia djudia en jeneral,
i la de los Djudios
Sefaradis i del Imperio Otomano en partikular en los kavos 500
anios.
Yo so nasido i
engrandesido en esta sivdad.
Si pensamos ke la
komunidad Djudia ke bive en esta sivdad desde el 16.en siglo yego a
serka
50 mil almas en el siglo
19 i oy lo ke biven ayi son solo 1400 Djudios, en una sivdad de
3.700.ooo habitantes,
siendo la sola minoridad non musulmana kon muy pokos kristianos
levantinos. Se ve ke esta
komunidad estuvo i esta ayinda influensada negativamente por
faktores i trokamientos
muy importantes, ke vienen prinsipalmente de lo ke se pasa en
Turkiya.
Oy en dia esta
komunidad Djudia ke tuvo un pasado tanto importante para la Turkiya
mezma
tambien, esta en estado
de tener ke luchar por su ekzistensia .
La komunıdad Djudıa de
Izmır fue karakterızada por las ondas de arivo de Djudıos Sefaradıs
de munchos lugares durante
el 17’en i 18’en siglos, kon los problemas ke trusho la diversidad
de orijin de estos grupos
: tradisyones, uzos, privilejios, diferensias ekonomikas, ke
okuparon
a los rabanim ke eran los
kapos de estas komunidades.
De onde viene la
importansa de La Komunidad Djudia de Izmir ?
1- Izmir fue un sentro
rabiniko muy importante,
187 rabinos
estan enterrrados en Izmir entre
1648 – 1868,
sienes de Rabinos ke eskrivieron sienes de livros sovre la Alaha,
responsa, mensionaremos por empesar
al Rav Eskapa del 17’en
siglo, ke tuvo ke krear alahot’es para
formar una komunitad ke
tenga los mezmos uzos, i al Rav Hayim Palachi del siglo 19 ke
eskrivio
mas ke 70 livros para
dizir komo tiene ke bivir la persona.
Izmir tuvo en du historia
syenes
de Rabinos famozos, esto
es sujeto ke puede okuparmos munchas horas
2- Izmir tiene un lugar
muy importante kon su prensa imprimida de diarios i semanales
en Ladino.
Fueron publikados en Izmir
sienes de livros, i munchos de eyos estan en
malorozamente
en perikolo de dezintegrasyon,
guadrados en una kamareta del Hospital Djudio.
3- La kontribusion del
komersante Djudio al dezvelopamiento ekonomiko del puerto de
Izmir
i de toda la rejyon del
Oueste de la Turkiya fue muy importante, en azyendo ke el puerto de
Izmir seyga el mas grande
puerto de eksportasion de produktos agrikolos de la rejyon del Ege
i de la Turkiya.
4 - Mos akodraremos de la
aparisyon del falso maschiah
Shabetay Tsvi, un Rabino de Izmir,
kon el schizmo ke kavzo
en el mundo Djudio, kuando una buena partida de Djudios Sefaradis
akseptaron –
por la forma- el Islam, La
influensa de los adeptes de Shabetay Zvi en la historia
Otomana i de la fondasion
de la Republika de Turkiya es inkontestable i oy en diya los Donmes,
ke son los desendientes
de los ke fueron detras de Shabtay Tsvi i akseptaron el Islam,
kontinuan
a preokupar la opinion
publika Turka, sovretodo despues ke el Islam empeso a reaksionar a
las reformas laikas
de Ataturk.
Kero dizir ke la Historia
de la Komunidad Djudia de Izmir es importante tambien en la historia
de la Turkiya
5- Izmir fue una komunidad
de Djudios ke siempre konservaron sus karakter mediterraneo,
la lingua, las
tradisyones i el folklor de los Djudios sefaradis de la Espania i de
Portugal.
Eyos bivieron en una
sivdad muy kosmopolita, serka de
Turkos, Levantinos
kristianos, Gregos, Ermenis , i supyeron frekuentarlos solo en la
vida
komersial sin mesklarsen kon eyos.
Oy no es mas ansi.
Kuando empesaron Djudios a
bivir en esta sivdad ?
o en la rejyon Egeana en el oeste de
la Anatolia : Muncho
antes de la ekspulsion de Espania.
Konsernando la prezensia
Djudia en Anatolia, la Tora mos konta la aventura de Noah en el
monte Ararat en el este de
la Anatolia, La vida de Avraam Avinu en Harran, el nasimiento de
los 12 ijos de Yaakov en
la mezma rejyon. El livro de Yoel del Tanah (ke fue eskrito
aproksimativamente en el
6.en siglo A.C.) mos konta
ke los komersantes de siervos Fenisianos vendiyeron Djudios a los
Ionianos ke bivian
en la rejyon Egeana. Ansi
es ke en la sivdad de Sardes
al lado de la sivdad de Salihli de oy, se save ke ekzistio
una komunidad Djudia
grande empesando del 5en. siglo A.C., i la prova es ke ainda oy
ekziste ayi la mas
antigua sinagoga del
mundo, ke es oy un sentro turistiko importante. Esta sinagoga es la
unika ke data del
2.
o 3.er siglo A.C. i ke esta en pies, kon una nicha ke sirvia de
(Aron haKodesh), lo ke no ekzistiya
en
las sinagogas mas antiguas ma ruinadas de Priene (5.siglo A.C. o de
Milet (4. siglo A.C).
Yosef Ben Matatiahu, o (Josephus
Flavius) ke eskrivio la historia djudia en el 1.er siglo A.C mos
konta ke Aristo enkontro
i avlo kon munchos Djudios kuando el kamino en la Anatolia
(en el 4.en siglo A.C).
El famozo orator Cicero ke bivyo en el 1.er siglo A.C avla de la
egzistensia
de Djudios en lugares
komo Edremit, Bergama i Dinar, todos no muy leshos de Izmir.
Los Djudios ke bivyeron en
la Anatolia desde los Romanos eran yamados Djudios Romaniotes,
ke avlavan el Grego, se
vistieran komo Gregos i meldavan la traduksion en Grego de la Tora
, el Septuagint,
traduksion ke fue echa en Alexandria entre el 3.er i el 1.er siglo
A.C por 72
savios (de ayi viene el
biervo Septuagint) , i sus lugar de orasion i de arekojersen se
yamava
Sinagoga, de ayi viene el
biervo.
Tambien el Santo Katoliko
Saint Polycarpe, ke bivyo en el Siglo 2. i ke es konsiderado el
Santo de Izmir, avla de
la prezensia Djudia en el Evangelion (Rev.1 :11,2,8). Serka de Izmir
los arkeologos
deskuvrieron una moneda kon la menora de 7 kandelas, segun aviya en
el arko
de Titus. Ma en el tiempo
Bizantino, antes ke ariven los Turkos a Izmir, en 1424, no avia
Djudios en Izmir..
La razon es ke en tiempo
Bizentino la vida Djudia en Izmir empeso a pedrer muncho su briyo :
El porto empeso a
inchirse de tierra por razones de tremblamentos de tierra.
Gerras i fuegos empidieron
el
desvelopamiento. En el
siglo 13 i 14 Izmir fue okupado por los Genovezes, los Venisyanos i
los
Kavalieros de Rodes. En
1402 Tamerlan deroko la sivdad. Ansi ke kuando empesaron a vinir
los Turkos del Este en
1424 i okupar tierras Bizentinas ( onde no bivian repozados), los
Djudios
los resivieron kon
alegria, i los Turkos les akordaron mas grande tolerensia. Por
la mezma
razon de tolerensia de
parte de los Turkos Ottomanos , Djudios de Evropa persekutidos
empesaron a vinir i
instalarsen .
Despues ke vinyeron los sefaradis , los Romaniotes de la
rejyon fueron absorbidos
por los sefaradis ladinoavlantes, i el sinyo de sus pasado ke arivo
asta oy son siertas
alkunias : komo Galimidi, Politi, Kalomiti, Kalaora i mezmo
Eskenazi.
Kuando los Djudios fueron
rondjados de Espania en el anio 1492 eyos vinyeron a las sivdades
Ottomanas sovre
la invitasyon del
Sultan Bayazit el segundo,
eyos eran 100-150 mil. 4 anios
despues se adjuntaron a
eyos los rondjados de Portugal. El arivo de Djudios a las sivdades
Otomanas o Evropeas a
Izmir kontinuo siempre, i entre eyos los ke boltaron al Djudaismo
despues de bivir komo
konversos, (o maranos o anusim) kon el espanto de la inkuizisyon.
Komo ya fue dicho, los
ekspulsados de Espania vinyeron a Izmir kuaje 100 anios despues,
despues ke unas kuantas
jenerasiones de eyos ya bivyeron en otras sivdades, seyga en Turkiya
seyga en Evropa. La razon
es ke el porto de Izmir empeso a ganar importansa . Esto es lo ke
aze la diferensia entre
kon otras komunidades sefaradis del imperio i Izmir.. Kuando el
Imperio
Otomano okupo Belgrade(
1521), embio a sus Djudios a Izmir, i la prima tomba Djudia ke se
enkontro en
Izmir data de 1546.. Los
sefaradis fueron para el imperio Ottomano una minoridad produktiva,
sometida i kayada,
i esto fue el sekreto de
sus vida sin problema entre los muzulmanos del Imperio .
Las ondas de la imigrasion
Djudia a Izmir vinyeron de varios manaderos
Despues ke el porto de
Izmir gano importansia komo porto de eksportasion, en el principio
del siglo 17, los
Djudios ke estuvieron arivando empesaron a morar en kartieres serka
del porto, en vizindado
kon kartieres onde biviyan los Turkos musulmanos. A estos se
adjustaron los konversos
de Portugal ke boltaron a sus Djudaismo. El 17.en siglo, el primer
siglo de la komunidad
Djudia de Izmir, fue la epoka de oro de los Djudios de Izmir
De los kazales i sivdades
vizinos :
Barnai moz dize ke los primos Djudios vinyeron a Izmir
de Tirya i de Manisa.
El primo Rabino de
Izmir fue el Rav Itshak HaLevi Dayan ke vino de Istanbul i se
instalo en Izmir en el anio
1606. En este siglo uvo
munchas epidemias ke izyeron munchos muertos, ma Djudios de
Manisa i Tiria
kontinuaron a vinir porke en sus sivdades tenian problemes
ekonomikos.,
i no podian mas pagar sus
taksas.
Imigrasion de Salonika :
Salonika ke era
un sentro Djudio i ekonomiko importante,
en el 16.en siglo sufrio
de munchas krizas, fuegos, tremblamientos de tierra (terramotos),
kollapsos ekonomikos, ansi ke
munchos Djudios se fueron
a Izmir. Entre eyos estava el famozo Rav Yosef Eskapa ke vino en el
anio 1620 i el es ke fue
en la baza de la vida de
de Komunidad Djudia durante siglos. Despues de el vino el Rav Ishak
Alba, ke era el Rav de
Shabtai Tzvi.
Es dicho ke durante el
17.en siglo la mayoria de los Djudios ke se aresentaron
en Izmir eran de Salonika.
Los Konversos de
Portugal :
Estos son los Anusim ke boltaron al Djudaismo despues ke salieron de
la peninsula Iberika,
en primero se instalaron
en Livorno i en Amsterdam,
bivyeron ayi i en
obteniendo la proteksion del Konsul de Fransia en Izmir en la mitad
del siglo 17, vinyeron i
se aresentaron en la sivdad en formando sus (Kahal) , ke en los
anios 1620-1630 se yamo
Kahal Portugal-Neve Shalom, ke mas despues se diviso en
2 kahales (Portugal) i
(Neve Shalom) de Djudios orijinarios de Portugal. Las Famiyas
Arias, Chavez, Yeshurun,
Perera, Ferera son de esta orijen.
Imigrantes de otros
lugares :
Djudios de sivdades komo Tsfat, Istanbul, Ankara las Islas
del mar Egeo, de
Italia,de Hollanda i otros lugares kon sus Rabinos, vinyeron i se
aresentaron en Izmir.
Djudios de los Balkanes i de las islas vinyeron durante el 17.en
siglo.
Entre estos, la famiya de
Shabtai Zvi vino de Moria en Gresya (ma el nasio en Izmir en 1626).
La
Famiya Gabay trusho su imprimeria de Livorno a Izmiren 1658 .
Los Djudios Evropeos ke se
aresentaron en Izmir preferaron de guadrar sus nasionalidad
ke de azersen sivdadinos
Otomanos: los Djudios los yamaron (los Frankos) ( ilos Ottomanos
los yamaron « mustamin ».
. Los Frankos se eran enrejistrados en los konsolatos estranjeros
de Izmir, se aziyan
Dhimmis, ke es protejidos del Imperio Ottomano komo todos despues
de 10 anios, Los Frankos
kon preteksto de ser protegidos por el konsolato Fransez o Italiano
miravan de fuyirsen de pagar
taksas komunales, i esto
kavzo munchos problemas en el seno
de la komunidad. Este
sujeto fue estudiado anchamente por la Sra. Rachel Saba Wolfe,
en su teza en el Sentro
Salti de la Universidad de Bar Ilan. ..
Visto ke los Djudios no
vinyeron a Izmir direktamente de la Espania o de Portugal, ma
solo kaje 100 anios
despues de aver bivido en otras sivdades, la komunidad de Izmir
estava
muy heterogena.
Eyos tomaron los uzos del
lugar ande biviyan, i en Izmir se adjuntaron
segun el lugar de ande
vinyeron, formaron Kahalim, kon un (marbits Tora) Rav en la
kavesera. En 1720 avia en
Izmir 6 Kahalim.
La mayoria de las
sinagogas antiguas de Izmir
tienen un estilo de arkitektura spesifiko.
La
teva – o la Bima- se topa entre kuatros kolumnas sentralas ke
sustienen al tavan i ke
divisan el espasio en 9
partidas iguales.
Las dekorasiones interioras son jeneralmente de
tavla kon motivos de
pintura ke se enkontran en las islas gregas i la Anatolia oksidental.
O motivos botanikos
relativos a Tu Bishvat.
Las sinagogas ke datan del
17-18’en siglo, komo Shalom, Hevra, La Sinyora estan situadas
en una kuadra de kuaje 1
km. siempre entornadas por una guerta, i serka de onde bivian o
lavoravan los djudios en el
sentro de Izmir. Kando en
el 19 siglo los Djudios se fueron a
otros kartieres, sa
fraguaron Kahales – o sinagogas. Komo Beit Levi de Karatash,
Mezaket haRabim del foburgo de
Karsiyaka,Rosh Haar
(de la muntania), Bet Israel en 1907, i en los anios 60
Shaar Hashamayim de Alsancak.
Estas son las Sinagogas ke
datan del siglo 17-18 i 19 ke ekzisten oy, kualas perfektamente
restorada, kualas derokadas en ruinas:
Kahal
Portugal o Neve Shalom
: Ke fundaron
los orijinarios de Portugal en la mitad
del 17.en siglo. Despues
este Kahal se aparto en dos. Kon tiempo se adjuntaron djente
ke no eran de Portugal, i
por ke avia ayi Rabanim de valor, este kahal fue el mas grande
de su epoka en Izmir.
Rav Benbenisti
Hayim i su ijo Israel eran de este kahal, tambien
Shabetay Tsvi. Oy esta
derokada.
Kahal Pinto :
Data de 1655 i su
donador fue Yosef Pinto de Tiria. Rav Eskapa
frekuentava este Kahal, i
enseniava en la Yeshiva de este Kahal donde los elevos viniyan
de otras sivdades.
Los yehidim se apartaron
segun sus parte en el kavzo de Shabetai Tzvi. Miembros de la famiya
Pinto tomaron parte de
Shabtai Zvi i este kahal sirvio asta 1670 de
sentro a los Shabtaim de
Izmir. No ekziste mas.
El
Kahal de la Sinyora (Giveret) :
Fue fundado en 1660 kon la donasion de la
Sinyora Dona Grasia Mendes
Nassi ma no bivyo en Izmir. Sus yehidim eran orijinarios
de Tiria i Manisa. Este
Kahal retorado ekziste ainda oy en perfekto estado.. Rav Shlomo
Algazi i Rav Shlomo Even
Ezra eran los rabinos importantes.
El
Kahal de Algazi :
Ekzistia en
1666 (Segun Barnai 1991 a, p.79) .
Es en esta sinagoga
ke un dia de Shabat
Shabetay Tzvi deklaro ser el ke kontrola la komunidad de Djudios en
Izmir..
Esta sinagoga era la ke
frekuento el Rav Shlomo Algazi, i ekziste restorada
perfektamente oy en dia.
Se yamo tambien el kahal de arriva. Fue resientemente restorada,
los ornamientos fueron
pintados por la Sra. Arditti de Izmir.
El
Kahal “Orhim” de Los Forasteros
: No se save ekzaktamente kuando se fundo,
ma fue restorado en 1830
.Se kree ke fueron los (Frankos) orijinarios de Livorno ke la
fundaron i lo izyeron sus
lugar de enkuentro. El Kahal de los
Forasteros era el kal de
Rebi Hayim Abulafia en el
19.en siglo, i mis avuelos de famiya Amado, entre eyos el
Rav David Amado
frekuentavan este kahal. Oy esta en ruinas.
El
Kahal Bikur Holim fue
fundado por Salamon Ciaves en 1690, ke era un komersante
de Hollanda ke se
estabilisyo en Izmir. En 1724 durante la epidemia de kolera sirvio
de
hospital.
El Kahal de los
Aydinlis o Shalom ke fue
yamado tambien el Kahal de Shabtai Zvi data
del 17.en siglo.
Se rekonstruyo en 1800, Se
yamava tambien el kahal de abasho.
El Kahal de Mahazike
Tora es de 1722, se yama tambien el Kahal de Sonsino ke izo
inyervar a los Turkos
porke pensaron ke avian kopiado la arkitektura de la Hisar Camii
famoza de Izmir.
Izmir sufrio de fuegos i
epidemias : en 1736 i 1801 tremblamientos de tierra, fuego ke
destruyo la sivdad en
1778, la epidemia de veba entre 1809 i 1812 mato 45000 personas.
En 1831 la epidemia de
kolera mato 5000 almas solo entre los Djudios. Ansi es ke
las sinagogas tuvieron ke
ser reparadas mezmo rekonstruidas. Por esta razon munchos
Djudios se fueron a morar
a otros kartieres i ayi fundaron nuevas sinagogas.
En 1898 se fondo el
Kahal de Bet Levi en Karatash, En 1907 se fondo el
Kahal de
Bet
Israel serka
de la Asansor, uno de los mas ermozos i elegantes del mundo, ayi
frekuentava mi famiya, ayi
tengo mis suvenires de chikes, ayi me kazi i ize Bar Mitzva. .
Kon una arkitektura i
dekorasion muy diferente i influensa Evropea ke trusheron artistos
Italianos :
El Aron haKodesh en la
pared oriental, i de sus dos partes dos Teva,
ornamentos i eskulpturas
de tavla muy impressionantes.
En Junio 2007 se fiesto el
sentenario de una manera
muy impressionante. Oy este kahal esta avierto solo los
Shabates i difisilmente
ay una o dos bodas al anio.
En el prisipio del siglo
20 avia en Izmir 10 sinagogas i 8 kazas de orasion.
Si La komunidad Djudia de
Izmir pudo konstruisir munchas sinagogas en un pays
Musulmano en poko tiempo,
lo ke demandava autorizasion del Sultan , esto prova ke
el status de los Djudios
era bastante fuerte.
Kontribusion a la ekonomia
En kurto tiempo los
komersantes Djudios fueron los mas importantes eksportadores, los ke
merkan el produkto
agrikolo de los kazalinos
agrikultores,
los ke lo manipulan i lo
traen al grado de eksportar, i los ke estabilisyeron kontakto kon
toda le Evropa. Ansina el
igo, la pasa, el tutun (tabako), el palamut (tanin para la industria
del kuero), la fruta
seka, el algodon de Izmir obtuvieron un renome Evropeo. Paralelamente
al arivo de Judios se
empeso a formarse kolonias de komersantes ke viniyan de los payizes
Evropeos, ke formaron la
komunidad de los Levantinos kristianos de Izmir, ke adoptaron
la lingua de los Gregos de
Izmir. En esta
epoka de reushitad ekonomika a Izmir venian
Djudios de Istanbul,
Korfu, Janina, Ankara, Tsfat, Salonika i de varios lugares a
adjuntarsen
a los ke ya bivian en
Izmir.
La Formasion de una
autoridad komunala sentrala Judia en la kavesa de la komunidad.
Segun en otras sivdades
del Imperio Ottomano, empesando del anio 1631 los Djudios de
la sivdad representados
por los differentes Kahalim tuvieron de eskojir la administrasion
komunala para reprezentarlos
enfrente del governo
Ottomano . Izmir tuvo en tiempo del establisimiento de la komunidad
dos importantes Rabinos (Hahambashis),
El Rav Yosef Eskapa
(1620-1662) i el Rav Hayim Benvenisti (despues de 1660). La
komunidad tenia tambien la funksion de
arkojer las taksas para el
governo. i taksas para los menesteres de la komunidad.
Desde
el Rav Eskapa nasido en
Salonika ke fue el primer Rabino de Izmir (1570-1662) i ke tuvo
ke luchar kon el
pretendido mashiah Shabetay Tzvi, i otros rabinos muy famozos, entre
los kualos
el Rav Hayim Palacci
(1778-1869) asta el siglo 20 Izmir fue un sentro relijiozo i
iliterario mas importante i de Istanbul
i de Salonika. Los
Rabinos Ishak Di alba, Aaron Lapapa, Shlomo Algazi, HayimBenveniste,
Eliyahu Hakohen,
Itshak Dayan,Hayim Azra
son del siglo 17.
Shabetay Tzvi
En el siglo 17 se bivyo en
Izmir i en el mundo Djudio un evenimiento muy trajiko i importante.
En 1648, un Rav mansevo
de Izmir yamado Shabetay Tzvi
deklaro ke el es el Mashiah ke
esperan los Djudios. Este
evenimyento ke tiene su orijen en Izmir es la mas grande kriza en el
Djudaismo Sefaradi
despues de la ekspulsion
asta el Holokosto del Siglo 20. Miles de Djudios akseptaron la ley
del islam, una partida solo en
forma, ma pedyeron el
kontakto kon loas komunidades
Djudias.
Shabetay Tzvi tomava su
inspirasyon de la Kabala, ke era el mistisizmo Djudio ke se
desvelopo
en Yerushalayim i Tsfat.
En deklarando su ser Mashiah, el prometia ke los Djudios ivan
aboltar
a la Tierra santa i
salvarsen de todas las sufriensas ke estavan teniendo akeya epoka,
kon las infermedades,
hazinuras kontajiozas i
fuegos. El ordeno de anular munchas Mitzvot de la ley.
Ansina kavzo ke luna
partida importante de Djudios se krean en el, i mezmo uvo ken se
kreo
entre los Kristianos i los
Musulmanos. Se perdio el kalmo i el equilibrio entre los Djudios.
Su fama se espandio en
otras sivdades i otros payises, inkluyendo Erets Yisrael.
La kontinuasion de este
evenimiento fue ke los Djudios se kesharon al Sultan, Sabetay Zvi
fue emprizonado i
despues ovligado de
eskojer entre provar su kapatchedad de azer maraviyas, o de akseptar
la relijyon musulmana
si no jeriya ke lo
kondanen a muerte.
Al final, el se izo
musulmano en tomando el nombre Kapidjibashi Mehmet Efendi. Sus
adeptes estuvieron chokeados,
una partida desho de
kreerse en Shabetay Tzvi, ma una grande partida, espesialmente entre
los Djudios de Salonika,
aksepto el Islam.
Los Sabetaistos formaron
una sekta ke todo en mostrandosen musulmanos kontinuaron a bivir
segun las rekomendasyones
de sus pseudo-profeta, algunas paresiendo a los djudios, otras
diferentes i muy
kuriozas. Malgrado ke tenian nombres Turkos, kada uno savia kualo
es su
nombre djudio, se kazaron
entre eyos, las komunidades Djudias de Salonika o de Izmir nunka
los konsideraron komo
Djudios malgrado ke kontinuaron a avlar i orasyonar en Judeo
Espaniol.
La Sekta de los Shabtaim o
Donmes, o Maaminim, tiene un lugar muy importante en la Historia
Turka Otomana i moderna,
eyos fueron los ke lavoraron para estabilisir valores Evropeas
en la vida del Imperio
Otomano, komo parlamento, komo libertades, i a la Turkiya moderna,
en kolaborando kon
Mustafa kemal Ataturk i apoyandolo en sus reformas de modernizasyon
:
de la eskritura en letras
Latinas, las vistimientas Evropeas, el laisizmo, la adaptasyon del
kodigo
sivil de la Suissa, etc.
Ataturk era nasido i edukado en Salonika, onde avia grande komunidad
de (donmes).
Kon el problema de
Shabetay Zvi, en esta komunidad Djudia mueva de Izmir, a los
diferentes
ke kontinuavan entre
Djudios de orijines diversas se adjusto el schismo de los Shabtaim.
Grasias al Rav Eskapa ke
tomo inisiativas i fue
kapatche de reorganizar la komunidad, los danios i las piedritas ke
kavzo el Shabtaismo furon
minimizados komparando kon
otras komunidades.El Rav Eskapa vinido a Izmir de Salonik murio en
1662 (5422) a la eded
de 93 anios.
Problemas en la vida de la
komunidad
En el 18.en siglo uvo un
desvelopamiente muy importante para la komunidad Djudia de Izmir,
i es el arrivo de los (Frankos).
Eston eran viejos konversos ke vinyeron de Livorno i de Salonika.
Sus rikeza, sus manera de
bivir, sus derechos partkolares por kavza de las Kapitulasyones a
los Evropeos,
influensaron negativamente
i se formaron klasas sosio ekonomikas bashas kon altas,
lo ke fue un sujeto de
desrepozo : proves i esnafes, chikos komersantes i artizanes kontra
los
Frankos rikos, i uvo
rabanim ke preferavan de estar de parte de los rikos kkuando otros
ke
defendiyan a los proves.
Esta lucha de klasas al
deredor del tema de las taksas komunales esta estudiada kon sus
aspektos sosiales i
literarios por la Sra.
Rahel Saba-Wolfe del Sentro Salti de la Universidad de Bar Ilan.
Los Frankos eran
industriales, grandes eksportadores, empiegados en los konsolatos,
traduktores
, etc.
ke no pagavan dasios ni al
governo ni a la komunidad porke gozavan de las kapitulasyones.
Ansi es ke se diziya “
aferro puerta de Franko” kuando uno reushia a topar echo entre los
estranjeros. Kuando un
mansevo se kazava kon una ija de estos rikos el matrimonio bivia e
na
kaza de la ija,i esto se
yamava “meza Franka. Esta diferensia entre Djudios rikos i proves
en
Izmir fue sujeto de
deskontentes ke influenso la vida komunala.
La djente prove bivia en
los kortijos, ke eran kamaretas al deredor de un espasio avyerto,
kon una tromba para
travar agua del pozo. Esta manera de habitasion era tan popular ke
kuando
los Djudios empesaron a
morar en kartieres muevos komo Karatach, Turkos mezmo fraguaron
kortijos, I munchas vezes
Djudios vizindeyaron kon Turkos en estos kortijos yamados Aile
Evi..
Vida Kulturala
Los Djudios de Izmir ya
tenian sus imprimeria desde el 17.en siglo.
Yedidya Gabay de Livorno
fue el primero ke trusho
la imprimeria a Izmir, 1657.
Malgrado la situasion
sosio ekonomika basha, del 17 en al 19 en siglo Izmir dio al
Djudaismo
asta los anios 1900 mas
ke 500 livros i publikasyones relijiozas de Rabinos muy famozos.
Komo ya lo dishe,
todos los livros i manuskritos de la komunidad Djudia de
Izmir nesesitan
un
lavoro de konservasion urgente.
Los ke podieron ser salvados se topan oy en una kamareta
del Hospital Djudio de
Izmir.
Los nombres i los livros
ke fueron eskritos desde el siglo `16 asta el siglo 20 por los
Rabinos de
izmir es sujete para una
larga konferensia. Livros de Alaha, Risponsa, Solo el Rav Hayim
Palachi eskrivio 72 livros.
Jurnales-Gazetas
En medyo de munchos
problemas, la sosiedad de djente aklarada (Maskilim) se fondo en
1840, i empesaron a ser
publikados
jurnales, gazetas Djudias.
El primo fue en
1846, (La Puerta del oriente), despues vinyeron
(La Buena
Esperansa1871-1910, El Novelista 1889-1922, El meserret 1897-1922 ,
La Verdad, L’Ustad).
Todos en letras hebreas i en Judeo-Espaniol. Asta el anio 1923 se
publikaron
mas 11 jurnales, i desde
1838 mas ke 110 livros de poeziya, kuentos i ovras relijioas, lo mas
en
Ladino, kon pokos en
Turko. Djudios eskriviyan artikolos en la prensa Turka, Franseza o
grega.
La prima
gazeta en Judeo Espaniol fue en el anio 1843 por Rafael Uziel, i
kontinuo asta el anio
1912 por
Aaron de Yosef Hazan, ke eskrivio tambien el romanso (El Muchacho
Abandonado) en
1877.
De 1842 asta
1959 salyeron en Izmir kuaje 300 publikasyones en Ladino, sovre los
mirakolos
de los
Rabanim, sovre la Historia Turka, livros de poezia, biografias,
piesas de teatro, impressiones
de viaje,
livros de matematika, para embezar el Ebreo, etc. etc.
Moshe
Shaul dize : »Izmir fue tambien, naturalmente, uno de los sentros
ande se kreo i se dezvelopo
el
ladino, en baza de las lenguas ke los djudios de Espanya avlavan
antes de la ekspulsion komo el kastilyano,
el katalan
etc..
Ma esta
kultura empeso a eskayer a la fin del siglo 19 komo konsekuensa
de unos
kuantos faktores.
En primer
lugar la aktividad de las eskolas de la Alliance onde la
ensenyansa
era en fransez. Estas eskolas reusheron a krear una klasa de
sefaradis tan empapados
de la
kultura franseza ke empesaron a menospresiar el ladino,
konsiderandolo komo una lengua ke podia servir a
lo mas
para la komunikasion kon los viejos i las klasas non edukadas de la
komunidad.
El Ladino
fue la lingua maternala asta los anios 1950, i despues de la
Republika Turka, todo en
Judeo
Espaniol fue eskrito kon letras latina, i no komo antes kon letras
de meruba o raschi.
La vida en los siglos 19 i
20.
En su livro
(Les Juifs d’Izmir) el Dr. Henri Nahoum presenta una informasyón de
grande valor sovre
la
evolusión de la komunidad judía de Izmir durante los siglos XIX y
XX. Durante los largos siglos del Imperio Otomano,
Izmir fue
lugar de muy diversos grupos étnikos independientes que bivian en
armonía basho el poder central y la
autoridad
imperial Ottomana. Grasias al konsepto de “millet” la povlasion se
organizava en sinko grupos bien definidos.
El grupo
mayoritario era el de los turkos de relijión musulmana, segyido por
los gregos de religión ortodoxa, los armenis también
ortodoxos,
los judíos, y los así yamados levantinos, formado por comerciantes
europeos cristianos que bivían en
Izmir en
forma permanente, provenientes de varios estados, entre otros,
Venecia, Francia, Inglaterra, y Holanda.
Gracias al sistema de “Kapitulasyones” los europeos no judíos y
algunos judíos originarios de
Livorno y
otras sivdades de Italia, que havían arivado en el siglo XVII,
gozavan del privilegio de mantener nasionalidades
estranjeras
que les asegurava protección legal a través de sus respektivos
consulados establecidos en Izmir.Konsolatos de
Fransia i de
Ingletierra fueron aviertos en el anio 1619. Por ekzemplo, el
Consulado Italiano de Izmir mantiene hasta el
presente un
archivo de datos familiares de interés genealógico de los ciudadanos
italianos que vivieron ayí desde aze
muchos anios.
La
puevlasion de Izmir
La evolusión de la poblasyón general en Izmir fue notable para la
época. De 100.000 habitantes,
asta 1800,
pasó a 225.000 en 1885.
Asta el
final del siglo XIX Izmir fue, aparte de Istanbul, la
sivdad de
mayor poblasyón del Imperio. Su poblasyón era mas grande que la de
Alexandría (Egipto), Damasco (Siria)
y Salónica
(Grecia).
En
1910 la poblasyón judía de Izmir era de unas 30.000 personas, sobre
un total de unos 230.000 habitantes y se avía
konvertido
en el puerto de la mas grande actividad de todo el Imperio Otomano.
Su
mayor aktividad i riqueza provenían del comercio y se formo antes de
la Primera Guerra
Mundial,
coincidente con la instalación de vías férreas que komunicaron el
puerto con muchas
chikas
localidades del interior,.
En entrando al 19.en siglo
la kondisyon sosio ekonomika kontinuo a deteriorarse.
Entre kuaje
4-5000 famiyas Djudias de
Izmir, avia solo 100 famiyas de komersantes, 1500 a 2000 famiyas de
esnafes de situasion
modesta, kon 500 rabinos.
1/3 de las famiyas, mas de 1000 bivian de sedaka, En un
raporto de la Aliansa esta dicho
“ Kuando entras a estas
kazas de la provedad, te tuye el korason i te saltan las lagrimas.
Famiyas de 10-12 personas
ke biven en in burako en
los kortijos, sin ventana, ande la luz entra solo por la puerta ! “
( Nahum, p.123) Los kartieres
djudios, kon los kurtijos
i famiyas biviendo en una kamareta primitiva eran sentros de
inyorensia i de provedad.
Los proves kontinuvan a
estar furiozos kontra los rikos, los “gevires” ke no pgan dasios
komunales segun los devrian.
Los Rabanim tambien
estavan ovligados de tomar pozisyon, ken por los proves,ken por los
rikos..
No solo los Djudios, la
vida del Imperio estuvo deteriorandose kon revolusiones de los
militares,
los Konsolatos
estranjeros se empesaron mesklar en la vida de los sivdadinos.
Los Frankos ke
eran de Nasionlidad
Italiana o Franseza empesaron a aderesarsen al Konsolato al lugar
de la Komunidad Djudia,
lo ke izo grande reaksion
entre los proves. Misyonarios Inglezes empesaron a ayudar a
kriaturas Djudias,
i siertos Djudios
empesaron a menazar de akseptar el Kristianizmo
, esto todo lo savemos de
las investigasyones del Profesor Yaakov Barnai ke es autoridad en
este
sujeto.
Gregos i Ermenis empesaron
a tomar el lugar de los Djudios en la aktividad ekonomika de la
sivdad..
Los Djudios de Izmir
sufrieron siempre de las kalomnias de los Gregos, ke pretendian kada
anio
antes de Pesah los Djudios
matan a un ijiko Grego i se sierven de su sangre para la preparasion
de la Matza. Si no tenian
la proteksion de administradores Ottomanos, no se ivan a terminar
en
Izmir las kalomnias de
los Gregos,
14
Un dezvelopamiento ke tuvo
lugar en el Imperio Ottomano, el Firman Tanzimat de 1836 empeso
a akordar a todas las
minoridades del Imperio derechos iguales de sivdadino.
El Sultan empeso a nominar a los
Hahambashis, a los Gran-Rabinos ke empesaron a tener un status
ofisial i igual kon
otros chefes religiozos.
El governo Turko tambien
enkorajava la modernizasyon del elemento Djudio.
Los Rabinos se oppozavan a
esto ma despues no uvo remedio empesaron a adaptarsen.
Gregos, Ermenis i Djudios
del Imperio no empleavan ni saviyan la lingua Turka, porke el
governo
no se mesklava en sus
vida. Ma poko a poko, los Djudios se empesaron a renderen kuento ke
no konoser el Turko i la
inyorensia eran la
prinsipala razon de la provedad, de estar sin echo ni prestija.
Las Eskolas Djudias en
Izmir
En el anio 1840, el Gran
Rabino de Turkiya Moshe Fresko publiko un dekreto i demando ke se
embezen el Turko.
En 1886 se avio en Izmir
la eskola Keter Tora onde munchas leksiones eran en Turko. Mas
despues, en el anio 1900,
sovre la direksion de
Aaron de Yosef Hazan se
fondo en Izmir la sosiedad para el embezo del Turko (Tamim-i Lisani
Osmani). Ansi empesaron
Djudios a topar echo en echos
del governo
Tradisyonalmente el
Djudio se iva a eskolas kon edukasyon relijyoza i en Ebreo. La
(ganenet) tradisyonala de la eskola
maternal se yamava la
“Maestra”. La eskola primaria era el (meldar), mas despues aviya lo
ke se yamava (Hevrot) para
embezar relijyon i
aritmetika, kon las Yeshivot.
En 1847 Avraam Enrikez
avio una eskola ke se yamo Talmud Tora, ke embezava lingua i
relijyon.
En el anio 1840 uvo la
famoza kalomnia de Damesek ke izo grande reaksion en el mundo Judio.
Los kapos del Judaismo de
Evropa, Rotschild, Montefiore i Cremieux kon el apoyo del Sultan
Otomano Abdulaziz
salvaron a los Djudios de
una katastrofa ke podian traer estas kalomnias de
sangre, en pensando ansi :
Los Djudios del Mediano Oriente estan para despareser por manko de
edukasion,
el solo remedio es la
edukasion moderna. En el anio 1860 se fondo la (Alliance Israelite
Universelle) ke lavoro
en tres direksiones:
Diplomasia, problema de imigrasion, i la Edukasyon. La Alliance
pensava ke El Judeo Espaniol
es un faktor negativo ke
esta deshando detras a los Djudios.
La lingua Franseza es la
lingua de la kultura, del komersio i de la ideolojiya Franseza ke es
Libertad, Igualdad,
Ermandad. Ay ke
krear eskolas modernas ke dan edukasyon en Fransez.
Los Rabinos se opozavan,
por ke kreyia ke la edukasyon moderna iva aleshar al Djudio de las
valores tradisyonalas
Djudias. El Ladino
iva despareser por ke el Fransez iva tomar su lugar.
Esta
kriza fue abatida kon las eskolas para ijos ke
avrioen 1850 el Baron de
Hirsch en Istanbul i en Izmir, las primeras de la Aliansa, onde la
eskola empesava kon la
Tefila de demanyana i
terminava kon el Arvit de la tadre kon la partisipasion de
los ensenyantes. Ansina
los Rabanim estavan sin opozisyon. En 1878 se avio en Izmir una
eskola
para ijas. En poko tiempo
se avrieron en sivdades Otomanas 50 eskolas de la Aliansa : solo en
izmir aviyan 7000
elevos en las eskolas de
la Aliansa. Los ensenyantes viniyan de Fransia –
los
empesijos- i lavoravan kon idealizmo) ,komo misyonarios.
Kon disiplina muy fuerte
el
prinsipio edukativo era :
« formar djente i sivdadinos de altas valores moralas para tener una
sosiedad kon estabilidad
politika” Se avrio kurses de kustura i broderia para las ijas, i
eskolas
superiores de komersio i
agrikultura para los ijos.
En 1898 se avrio la eskola
Djudia de Karatas kon el apoyo de la Aliansa. En 1922 la lodga de
Bene Berit fondo la
eskola Midrash Ivrit, ke estuvo avierta asta los anios 50.
Las eskolas de la Aliansa
se izyeron las mijores eskolas del Imperio, munchos elevos
Musulmanos i Kristyanos
estudiaron en estas eskolas, no solo Djudios. Yo konosi Turkos
ke estudiaron en la
Alliansa.
Despues de 2 siglos de
dekadensia, los Djudios del Imperio i de Izmir se trokaron i se
despertaron.
Kon
la influensia franseza los nombres de los Djudios empesaron a
(frankearsen) ! Moshe se izo Maurice,
Yaacov se izo Jacques,
Mazaltov se izo Mathilde, etc. Konoser el fransez era kestion de
(status). Los direktores
de la Aliansa eran djente
muy kultivada konosiendo munchas linguas.
De las eskolas de la
Aliansa se formaron los dirijentes futuros de la komunidad.
Eyos formaron sosiedades
para
enalteser el nivel sosial
i kultural, para dar ayudo a los menesterozos.
La Bnei Brit,
los Masones fueron las
sosietades de los Djudios o kon grande partisipasyon de los Djudios
edukados.
Un otro desvelopamiento
konserna la administrasion : Avia el Bet Din de 3 a 7
miembros, en su kavesera el
Rav Rashi. Era un tribunal
relijiozo ke trata de konfliktos siviles i komersiales entre
judios (en vezes kon non
Judios), i avia el Konsilio Komunal de 12 personas elijidas.
Sienes de
anios la komunidad era
dirijida solo por los Rabanim.
Kon la edukasion los
dirijentes empesaron
a ser jente laik,
evropea, edukada. Los rabanim no tenian ke adaptarsen a este
trokamiento. Por ke entendieron
ke el buto es de tener
Djudios mas savidos i mas edukados..
La forma de bivir de los
(edukados Djudios) de la Aliansa empeso a afloshar el atadijo de
siertos
a la relijion , algunos
se sintyeron mas Djudios, algunos otros miraron a integrarsen mas a
la vida
kon los Turkos. Esto
empeso mas en 1908, kon la segunda mesrutiyet ke dava igualidad i
derachos de sivdadinos
todas las minoridades.
Ma tenian ke irsen al
servisio militar o pagar una indemnidad
(bedel-i Askeriye) para la
ekzempsion del servisio militar. Ma esta igualidad no era
entera : eldjudio se podia
azer soldado ma no officier (katsin). La prensa Djudia estava
kontente
de las prometas de
Ottomanismo. Kuando empeso el Siyonizmo en Evropa vemos en la prensa
de Izmir artikolos kontra
el siyonizmo, al lado de otros por la independensia Judia. Vemos
Djudios Izmirlis entre los
fondadores del Kizilay (el Kresente Kolorado) de la Turkia komo
Mordehay levi efemdi,
Selim Mizrahi efendi, El Avokato Gad Franko. Munchos ke avlavan
el Turko perfekto eran
empleados del governo.
La Okupasion Grega de 1919
Durante los
anyos de la Primera Guerra Mundial se aksentuó definitivamente la
desintegrasyón
del poder
Otomano. El 15 de mayo de 1919, unos 12.000 soldados gregos
dezembarkaron en
Izmir “para
proteger a la población griega”, segun lo pretendian.. Despues de la
okupasyon de
Izmir, La
mueva administrasyón griega, se ekstendió a numerosas localidades
del interior, hasta
que en
agosto-septiembre de 1922 Kemal Ataturk reconquistó con sus tropas
toda la región
costera,
obligando a los remanentes griegos a una retirada katastrofika.
Al
proseso de retirada
de los
gregos, se generaron los famosos incendios en múltiples localidades
del interior y en Izmir,
que dejaron
a la población civil sin techo .. Sivdades i kazales enteros komo
Cassaba, Manisa,
Aydin y
muchos otros, fueron arrasados por el fuego. A pesar de toda la
destrucción e
incertidumbre del momento, los judíos de Izmir aclamaron como
libertadores a Kemal y sus
tropas, al
prisipio mismo de la nueva Repúblika Turca que markó la fin del
Imperio.
La emigrasión de izmirlís a Argentina, a las Amerikas, a la Fransia
se produsio precisamente
en los
primeros añios de la década de 1920, koinsidente con el empesijo de
la grande
transformasyón
del Imperio Otomano en la República Turca. Los ijos de estos Djudios
ke
emigraron a la Amerika del Sud emigraron a Israel i kontan ke sus
padres y avuelos
les kontaron
sus memorias de esta época terrible que marcó la salida de muchas
familias
judías,
despues de varios siglos de asentamiento en la tierra que nunka se
la olvidaron.
La población
judía de Izmir es hoy unas 1400 personas y konstituye el único grupo
minoritario d
e la sivdad,
ke se esfuersa de guadrar lo mas ke puede del pasado de 500 anios de
prezensia Djudia..
Kontribusion
a la musika Turka :
El kontakto kon los Turkos
izo ke ayga influensa musulmana en la vida de los djudios,
partkularmente en la
liturjia i la muzika, i sierto folklor
En el kampo
de la Musika, Tenemos ke mensionar ke el enkontro de los sefaradis
kon la musika i liturjia musulmana
aga ke ayga
kompozitores i ensenyantes de musika Turka klassika, Haham
Yomtov
Danon, Avraam Arias, Eliya Levi (santuri liya) komo Misirli Ibrahim
(Avraam Hayat
Levi) , Tanburi Isak (Varon), Hoca Santo (Shemtov Shikar).
Los
kompozitores Djudios de Izmir
De musika
Turka i de liturjia relijyoza Djudia tienen un lugar importante en
el patrimonio
muzikal de
la Turkiya. En a fin del 19. siglo Avia la famiya de muzikantes
Algazi, Shlomo
(yamado el
bilbil) i Yitzhak Algazi ke
era un hazan eksepsional, ke mesmo elpresidente de la
Turkia Mustafa Kemal Ataturk kijo sintir su musika.
No avia en
Izmir fiesta sin muzika, transferir
el anshugar
de la novia sin tanyedores. Albert Hemsi era konduktor i spesialisto
de muzika klasika.
Oy mezmo,
en esta komunidad chika de Izmir ay una sinyora joven en la Opera de
Izmir, se yama Linette Shaul
i dos otros
ke estudian musika klasika. Dario Moreno, Izmirli de la Asansor, izi
una
fama
internasionala en los anios 60. i la kaleja de la Asansor donde
morava se yama agora
la kaye
Dario Moreno.
El arte
entre los Djudios de Izmir es sovre sujetos relijyozos :
Shivitis, decoupages, Judaika de
plata kon motivos Djudios i Turkos, broderias kon ilo de oro para
kuvierturas de los livros santos
, etc.
Oy en Izmir ay unas kuantas damas ke son pintoras de talento, i Sela
Arditi rekontrruizio
los
ornamentos de pintura en las sinagogas reparadas.
Sosiedades
de Bienfezensia
Puedeser la
mayoria de los Djudios de Izmir eran proves o esnafes kon muncha
karga de famiya. Djesnte de
buena
voluntad miraron siempre de ayudar a los ke lo nesesitavan. Ozer
Dalim ayudo
los
proves, Bikur Holim a los hazinos, Nido de Guerfanos para kriaturas
sin padre o madre,
Ahnasat Kala para kazar a ijikas proves.
La Hevra
Kadisha shel Kabarim eran voluntarios ke se okupavan de los muertos,
Ahnasat
Orhim para ayudar a los ke viniyan de otras sivdades, etc.
La Liga de
Paz era para modernizar la sosiedad i grupar a los mansevos. Ekziste
i tiene una
funksion
importante ayinda oy en Izmir.
18
Los
simeterios de Izmir
El simeterio
de Bahri Baba era el mas antiguo, del 16 en al 19 en siglo. Fue
anulado kuando lo
kijeron
azer parko. De ayi se yevaron una partida de las tombas al simeterio
de Kanchesme,
entre las
kualas la tomba del Rav Hayim Palacci, ke es vijitada i la agua de
ayi sierve para el
mikve i
komo agua kon segula a los ke vienen a la ilula del Rav
importante. Este simeterio
ekziste ma
no se uza, en los anios 1930 se izo el simeterio aktual de Altindag,
ke esta
perfektamente mirado. En Izmir se uzo enterrar ombres i mujeres
separadamente, ma en los
kavos anios
empesaron a abandonar este minhag.
El Siyonizmo
i la Aliya
Komo ya lo
savemos, en los anios de la segunda guerra mundial, en 1942-43, el
governo Turko
basho la
influensa Alemana - malgrado ke no partisipo a la gerra- impozo
dasyo muy fuerte a la minoridad
Djudia en
partikolar ( La taksa de la posession=Varlik vergisi) ke ruino
ekonomikamente a los Djudios, i el enbio de las 20 klasas al
servisio militar i lavoros forsados,
en toda la
Turkiya i tambien en Izmir.
Munchos
perdyeron sus situasyon ekonomika, algunos no podyeron
revenir a
sus estado de antes del Varlik.
Esto tambien
fue un faktor para la aliya a Israel.
El Djudio de
Izmir tuvo una relasion ambivalente al Siyonizmo en los anios de la
prima guerra
mundial.
Avia en la prensa Djudia de Izmir artikolos kontra el Siyonizmo i la
Aliya, i por el Ottomanismo.
En los
anios de la segunda guerra mundial Djudios Sionistos de Izmir
ayudaron
a salvar a
los ke pudyeron fuyirsen del holokosto, unas mil almas, mezo las
Islas Gregas i
el porto de
Chesme. Esto no se save muncho.
Despues de
la segunda guerra mundial El Djudio de Izmir embio en primero a sus
ijos,
despues el
mezmo, kuaje 10 mil Djudios de Izmir izyeron sus aliya a Israel. De
15000
kedaron solo
3000 almas.
Esta aliya
izo ke munchos Djudios de Izmir tomen postos importantes en el nuevo
estado de
Israel.
Personas modestas en Izmir se izyeron mayor de sivdad (Altalef en
Yehud), deputado
(Moshe
Sardinas), ofisieres importantes (Altun, Ben Shushan), profesores de
universidad
(Almog-Albagli, Sidi, Tovi, Barki,) direktor de emisyones de Radio
en Ladino (Moshe Shaul,
Alegra
Amado) etc.
Munchos fundaron Kibutzim ( komo Hagoshrim), Moshavim
(komo Geva carmel, Tal Shahar).
Un diplomat,
Barsimantov fue asasinado en Paris.
Kedaron
pokos Djudios,i en los anios 50 i 60 munchos se adjuntaron a sus
ijos en Israel.
Gracias a
los djudios de sivdades de la rejion komo todos los Djudios de
Tiria, de Milas, de
Bergama, de
Menemen,Kasaba etc. pudieron ser komo 3000, i oy en dia kedaron
solamente 1500.
El proseso
de Turkifikasyon
La Republika
Turka se esfuerso siempre de imponer su kultura, su lingua a las
minoridades.
Mezmo
en las eskolas Djudias ke no ekzisten mas en Izmir, la lingua de
ensenyamento fue
unikamente
el Turko, sin lisyones de relijyon i de historia Djudia. Lo ke izo
ke en las dos ultimas jemerasiones
el
Judeo-Espaniol no se avla pratikamente mas, el Ebreo tanpoko, falta
de rabinos karizmatikos i de la epoka,
los
estudios en institusyones Turkas, la frekuentasion kon los Turkos
Musulmanos izyeron ke ayga un aleshamiento
de la
komunidad , asimilasyon i kazamientos
mikstos.
Esto malgrado los esforsos de edukar a los jovenes afuera de la
eskola en klubes de
jovenes
komo (La Liga), Kavamente shlihim de Israel miran de influensar i
restabilisir valores relijiozas a los jovenes.
La
administrasion de la komunidad Djudia
de oy
esta en mano de una ekipa relativamente
manseva, de
un grande nivel intellektual, el presidente es el Injenier Jak Kaya,
i azen esforsos para mantener
la unidad i
las valores Djudias, kon karne Kasher, mantenir las sinagogas en un
estado perfekto, servisios de
Hevra
Kadisha impekables, Hospital, Azilo de viejos, ayudo sosial a los ke
lo
nesesitan etc.
En el mes de
Junio 2007 se fiesto el sentenario de la sinagoga Bet Israel , una
de las sinagogas
las mas impresionantes del mundo.
Agora se
adjusto a esto una ekspozisyon permanente de
Judaika de
Izmir : todo esto kon 150 voluntarios, kere dizir ke 1 de kada 10
Djudios de Izmir
lavoran
benevolmente para mantener estas institusiones bivas : institusyones
ke sirvieron a
30-40 mil
Djudios aze 100 anios, i agora estan en mano de 1500 personas, i la
tara es muy difisil.
Visto ke la
Kashrut es importante para la industria de los produktos komestibles
eksportados de
Turkiya , i
los Haredim ekzijen sus propios mashgihim, ekzisten en Istanbul i en
Izmir dos
Rabinos del
sekto Habad ke se okupan tambien de ensenyar Djudaizmo, lo ke kavza
deskontentes
en unos, i kontentes en otros ke sienten el )vakum) del manko de
edukasyon Djudia..
Djuntos kon
esto, ekziste una otra realidad ke logra kontra la komunidad, i es
ke los jovenes ke estudian
en la
Universidad lo azen afuera de Izmir i no keren
boltar mas,
preferan installarsen en Istanbul, la kapitala ekonomika de Turkiya,
ande ay mas
munchas
probabilidades de lavoro kon chances de enkontrar un joven o jovena
para kazamiento.
En Izmir se
enkuentran oy munchas famiyas donde los ijos no biven mas en Izmir.
Lo ke va
ser grande
problema en 20-30 anios. Al punto de meter en kestion si va aver mas
komunidad
Djudia en
izmir.
En izmir
tenemos dichas i refranes partikolares : (Ni Pesah sin Matza,
ni ija sin mazal), o
( Pensando
al invyerno no se gozo del enverano), o (El mazal es redondo, por
esto no se
keda en su
lugar), o ( Amigos ermanos seremos, las bolsas no tokaremos).
O, dichas
komo
(Landre le
dio) en suvenir de la epidemia de peste –landre- ke uvo en la
sivdad.
El Folklor :
de la fasha asta la mortaja :
Las bodas
(o kazamientos) eran akuerdos entre famiyas ke empesava kon
(despozorio).
El novio
reiviya una
dota del padre de la ija. Kada ija tenia su anshugar ( el refran :
La ija en la fasha kon el anshugar en la kasha).
La valor
del anshugar se eskriviya en la
ketuba. La Tavla de Dulse
de plata
era kuaje
kondisyonal. El uzo de azer (Noche de Alhenia) desparesyo en el
siglo 19. El fostan de
novia
blanko es de 100 anios, antes era de velur brodado. En salyendo de
la kehila se iva a kaza
para partir
la kezada, ke era masa de almendra i
asukar,
a la kuala
les davan forma de dos pichones para augurar ke se pasen komo dos
pasharos. Bien
entendido ke
no avia ni Ulam ni Ckekes, a la tavla de la kezada la djente metiyan
los regalos
a la novia,
ke eran maniyas de oro o liras de ora. Al diya sigyente las famiyas
fiestavan la Sebah,
se komiya
peshkado, i la famiya del novio resiviya la riza manchada de sangre
ke provava la honestedad de la ija.
El Brit del
resien nasido, el Fadar de la ija, las namusiyas brodadas de la
parida, el Pidyon Haben
para el
primer ijo nasido, el Kiddush, la aliya la Tora eran valores djudias
ke ninguno las abandonava.
Kon le parte
gastronomika a la fin de mi prezentasion,
mi buto es desharvos una buena savor
en la boka
Tenemos en Izmir una parte gastronomika puramente sefaradi ke
es bien konosoda:
Kada fiesta
tenia su gastronomiya : pesah kon los bimuelos i las minas, Purim
kon la forka de
Aman (i no
avia sufganiot o levivot) Shavuot era todo blanko, sharope, sutlac,
mogado de susam etc.) Los boyos,
las
fritadas, las burekas, los travados, tomat reynado, marunchinos,
fongos, pasteles, reshikas, guevos roshos,
kon la
Pandispania famoza.
En el anio
2004 6 damas Izmirliyas izyeron de las
komidas sefaradis
de Izmir in livro,
son las Sras. Nuhket Franko, Sara Enrikez, Ora Gurkan, Esther Antebi,
Jinet Sidi
Tsarfati. Vale la pena de konoser este livro.
El Futuro
Si pensamos
ke en 100 anios la puevlasion Djudia de Izmir paso de 50000 a 1500,
i esto kon
los ke
instalaron en Izmir de Milas, de Tirya, de Kasaba, de Aydin, de
Manisa, de Akhisar, de Bergama, etc. i ver ke los
mansevos no
estan kedando en Izmir, Los kazamientos mikstos, el dezintereso de
algunos a todo lo ke es Djudio,
no deshan
lugar a ser optimizto. Ma kuando
ves komo
los ke estan en la kavesera de la komunidad lavoran para mantener la
vida Djudia
kon todas
las difikultades, mantener, renovar sinagogas, simeterio, hospital,
azilo de viejos, los esforsos de dar
un poko de
edukasion Djudia a los chikos i a los mansevos, a los voluntarios i
voluntarias, a los ke eskriven livros de
historia de
la komunidad komo Sara Pardo, a este livro
de
Gastronomia Djudia sefaradita de Izmir, a la kualita intellektuala
de siertos komo el poeta
Avraam
Ventura, al artisto-fotografo Yosef Tuvi, a la soprano Linette
Shaul, todos de renome
konosido en
la Turkiya, i otros, ay razones de pensar ke ningunos desharan ke
se amate la luz
qde esta
komunidad ke izo honor al Djudaismo Sefaradi durante 4 siglos .
Selim Amado
5.3.2007
B i b
l i o g r a f i a
Sara Pardo - Izmir
Yahudileri
Dr. Henri Nahum - Les
Juifs d’Izmir
Moshe
Shaul - Aki Yerushalayim
Rahel
Saba Wolfe - Teza de Master
Sitios en la Internet
sovre los Djudios de Izmir
